സൈലൻസ് പ്ലീസ് !

കവലയിൽ വന്നു
മതത്തിന്റെയോ
സമൂഹത്തിന്റെയോ
മൂട് നക്കി നുണയാതെ
താന്തോന്നിതരങ്ങൾക്ക് നേരെ
കാര്യം കാര്യമായി പറയുന്നവനെ
ആദ്യം പറയും
'ഓന് വേറെ ലെവൽ ആണന്നു'
പിന്നെ പിന്നെ
വട്ടം കൂടി
കൂട്ടം കൂടി പറയും
'ഓന് ഒരു ലെവലുമില്ലെന്നു' .!

സ്വാഷ്യലിസം

ആരാ പറഞ്ഞത്
ഭൂമിയിൽ ദൈവം
സ്വാഷ്യലിസം നടപ്പാക്കിയില്ലെന്ന്.
നിങ്ങൾ തന്നെ നോക്കൂ
മണ്ണിനടിയിൽ
മതമോ  ജാതിയോ
നിറമോ  ലിംഗഭേദങ്ങളോ
തരംതിരിവില്ലാതെ
ഒരു വിപ്ലവംപോലും നടത്താതെ
കെട്ടിപ്പിടിച്ചു  കൈകോർത്തു
നിൽക്കുന്ന വേരുകളെ ..!

ചീത്ത വിളിക്കുന്നവരോട്

നീയൊരു ശൈതാനാണന്നോ
പിശാചാണന്നോ പറഞ്ഞു
ആരെയും പഴിക്കരുത്
അവരെ പോലെ നന്മ അറിയുന്നവർ
ഭൂമിയിൽ ഉണ്ടാവില്ല
അല്ലെങ്കിൽ പിന്നെ
തിന്മ ചെയ്യുന്നവർക്കിടയിൽ
നന്മ ചെയ്യുന്നവരെ മാത്രം
അവരെങ്ങനെ തിരിച്ചറിയുന്നു...?

ഭഗവാൻ അറിയാൻ

പേന നിലത്തുവെച്ച് കീഴടങ്ങിയ
പെരുമാൾ മുരുകനോട്
ചോദിക്കണമെന്നില്ല
ഭൂമി വിശ്വാസികളുടേതോ
അന്ധ വിശ്വസികളുടേതോയെന്ന്
രണ്ടായാലും അവര്ക്ക് വിട്ടുകൊടുക്കുക .
ക്ഷമിക്കുക
ഗൊവിന്ദു പൻസാരെ,
നരേന്ദ്ര ദഭൊൽക്കരെ,
ക്കൽബുർകി
സ്വർഗത്തിലേക്കുളള വഴി പറഞ്ഞാൽ
നിങ്ങള്ക്ക് ഒരു മരത്തെ പോലെ
ഭൂമിയിൽ വേരുറച്ചു നിൽക്കാൻ
പറ്റണമെന്നില്ല.
അല്ലയോ 'ഭഗവാൻ'
മതത്തിനെതിരെ നിരന്തരം
ഓരിയിട്ടിരുന്ന ശുനകൻ പോലും
സമരം നിർത്തി പോയത്
നിങ്ങളറിഞ്ഞില്ലേ ...?

എന്റെ പെണ്ണുങ്ങൾ

ഏക വചനവും
ബഹുവചനവും
അറിയാത്തത് കൊണ്ടാവില്ല
കെട്ടിയവളെ
എന്റെ പെണ്ണ് യെന്നതിനു പകരം
എന്റെ പെണ്ണുങ്ങൾ എന്ന് പറയുന്നത്.
ചിലപ്പോൾ
മൂക്കു കയർ പൊട്ടിച്ചു പോയാൽ
പുരുഷനു ആലയിൽ കെട്ടാൻ
മറ്റൊരു മാടിനെ കിട്ടുമെന്ന്
അവളെ
ഓർമ്മപ്പെടുതുന്നതാവാം അത് !!!

# മലപ്പുറത്ത്‌ ഭാര്യമാരെ
 എന്റെ പെണ്ണ് എന്നതിനു പകരം
എന്റെ പെണ്ണുങ്ങൾ എന്നാണ് പറയാറ് #

സിസേറിയൻ

തല തിരിഞ്ഞുപോയത്
കൊണ്ടാണ് അവളുടെയും
വയറു കീറിമുറിച്ചത്
അത്രയും ചെറിയ സ്പയിസ്
കൊടുത്തിട്ടുപോലും
കുട്ടി തലതിരിഞ്ഞു
തോന്നിയ വഴിയേ പോയി.
അല്ലെങ്കിലും
 E - കാലത്ത് തലതിരിഞ്ഞു
പോകാത്ത കുട്ടികളെ കിട്ടാൻ
പ്രയാസമാണ്
ഗർഭപാത്രത്തിൽ അവരങ്ങനെ
പുഷ്പ്പിക്കുമ്പോൾ തന്നെ
കണ്ടതും കേട്ടതും
മൊബൈലും ഇൻറ്റർനെറ്റുമല്ലേ..!!!

നഷ്ടങ്ങളുടെ കണക്ക്

വെളിച്ചമേ
നിനക്ക് കൃത്യതയുണ്ട്
നീ പുറപ്പെടുകയും
വന്നണയുകയും ചെയ്യുന്നതിന്
എനിക്ക് ഒന്നേ പറയാനുളളു
നീ ഇരുട്ടുമായി കൂട്ടുകൂടരുത്
എവിടയും കയറിവരാനുളള
അവന്‍റെ സ്വാതന്ത്രം
നീ കണ്ട സുന്ദരലോകത്തിന്റെ
മറ്റൊരു കഥപറയും
പിന്നെ നീയുംപറയും
മൂക്കത്ത് വിരൽവെച്ചു
ഭൂതകാലത്തിലെ
നഷ്ടങ്ങളുടെ കണക്ക്..!!!

അനന്തരം

ആവിശ്യമുളളതിലും
ഇല്ലാത്തതിലും ഇടപ്പെട്ട്
കവലയിൽ ഒരു പടു മരമായി
നിന്നപ്പോൾ അവനൊരു
'നായി'ആണന്നു പറഞ്ഞു .
പതിയെ പതിയെ വളർന്നു
പണം മൊട്ടിട്ടു പുഷ്പിച്ചപ്പോൾ
അനന്തരം
നായി എന്നത്
'നന്നായി ' എന്നായി ...!


# നായ എന്നത് മല പ്പുറത്ത് നായി
എന്നാണ് പറയാറ് #

അലാറം

പൊടുന്നനെ
ഒരുപാട് സ്വപ്നങ്ങളെ
തല്ലി തകർത്തതും
പല സ്വപ്നങ്ങളിലേക്ക്
നമ്മളെ എത്തിക്കുന്നതും
ഇതേ അലാറം തന്നെയാണ് ...!

തല വര

അല്ലെങ്കിലും
പണ്ടേ പറയുന്നതാ
നിന്റെ തല വര നന്നാവാത്തതും
അവന്റെ തല വര നന്നായതും
നിന്റെ തലയെഴുത്തു നന്നാവാത്തതും
അവന്റെ തലയെഴുത്തു നന്നായതും.
അങ്ങിനെയെങ്കിൽ
വിധിയെ എന്തിനു നാം കുറ്റപ്പെടുത്തണം
ഏറ്റവും നല്ല എഴുത്തുകാരനും
ചിത്രകാരനും ദൈവം തന്നെ
മോശമായതും...!

പാവം ദൈവം

മരങ്ങൾ നാടു കടത്തി
മലകൾ നിരത്തി
പുഴകൾ നശിപ്പിച്ചു
വയലുകൾ നിരത്തി
തോരാത്ത മഴയോടും
കാറ്റിനോടും പിറ് പിറുത്തു
പറ്റുമെങ്കിൽ കടലും വറ്റിച്ചു
ഈ ഭൂമിക്കു നാം മാണ്‌
അവകാശികളെന്നു പറഞ്ഞു
പരസ്പരം കാണാത്ത
മതിലുകൾ കെട്ടിപൊക്കി
ഇവയെല്ലാം കണ്ടു നിൽക്കുന്ന
പാവം ദൈവത്തോട് തന്നെ
ചോദിക്കൂ
സർവ്വ ഐശ്വര്യവും
സമൃതിയും തരാൻ ...

എന്റെ

ഒന്നും ആരുടേയും
സ്വന്തമല്ലല്ലോ
എന്നിട്ടും ഈ മനുഷ്യർ
പറഞ്ഞു കൊണ്ടേയിരിക്കും
എന്റെ ഭൂമി
എന്റെ വീട്
എന്റെ ഭാര്യ
എന്റെ ധനം
എന്റെ മക്കൾ.....
ചിലപ്പോൾ
മരിക്കും വരെ
മനുഷ്യർ പറയുന്ന
വലിയൊരു നുണയാകാം ഇത്...!

രണ്ടു കവിതകൾ

വൃദ്ധ സദനം

ഇനി എത്ര തവണ പറയണം
ഇവേറ്റകളോട്
ഈ ഫോണിൽ ഇത് തന്നെ .
മരിക്കാത്ത ഫോസിലുകൾക്കിടയിൽ
ആമിനയുടെ മൂക്കിനു
താഴെ വിരൽ വെച്ച് നോക്കി
അയാൾ പിന്നെയും
ഫോണിനു കാവലിരുന്നു
ഇനി ഒരാൾ മരിക്കുന്നത് വരെ
പുതിയ അഡ്മിഷനില്ലന്നു
പറയാൻ....!

ഫുൾ പാകാജ്

ഫുൾ പാകേജ് തന്നെ
എടുത്തോളു
 ഒന്നുമേ അറിയിക്കണ്ടാ
എന്ത് വേണെമെങ്കിലും ചെയ്യാം
കത്തിക്കുകയോ
കുഴിച്ചിടുകയോ
എന്ത് വേണെമെങ്കിലുംചെയ്യാം....
എന്ന്
സ്വന്തം മകൻ
ഒപ്പ് .

തുടക്കം

മുപ്പതു വർഷം ഞാനിരുന്നു
കച്ചവടം ചെയ്തതാണ് ഇവിടം
ആരോടും നുണ പറയുകയോ
പറ്റിക്കുകയോ അരുത്.
സത്യസന്ധതയെ   കുറിച്ച്
മണിക്കൂറുകളോളം സംസാരിച്ചു
ബാപ്പ മകനെ
കസേരയിൽ ഇരുത്തി
പടിയിറങ്ങുമ്പോൾ
അവസാനമായി
മകന്റെ ചെവിയിൽ
ആരും കേൾക്കാതെ
ഇങ്ങിനെ പറഞ്ഞു
'ആര് ചില്ലറ ചോദിച്ചാലും
ഇല്ലെന്നു പറയുകാ'...!

ഇന്ന് ....!

ഇന്നലെ
ബഷീർ വന്നു
കൂടെ
വൈലോപ്പില്ളിയും
ചങ്ങമ്പുഴയും
കമല സുരയ്യയും...
തിക്കിലും തിരക്കിലും
അവരെയാണ്
കാണാൻ പറ്റിയത്.
ഒറ്റ ദിവസം കൊണ്ടവർ
പുഴകൾ ,മലകൾ,
വയലുകൾ താണ്ടി
കേരളത്തിൽ നിന്ന്
വണ്ടി കയറുമ്പോൾ
അവർ എഴുതുന്നുണ്ടായിരുന്നു
ബംഗാളിയെ കുറിച്ച്
ആസാമികളെ കുറിച്ച്
അങ്ങിനെ ....അങ്ങിനെ....

പ്ളിംഗ്...!

രാഷ്ടീയക്കാർ
മതനേതാക്കന്മാർ
നുണയൻമാർ
അഴിമതിക്കാർ
കളളൻമാർ

കൊലപാതകർ
ബലാത്സംഗ ക്കാർ
സത്യത്തിനു ശബ്ദമുയർതുന്നവർ...
അങ്ങിനെ സകലവന്മാര്ക്കും
കിട്ടുന്നുണ്ട്‌ ' പ്ളിംഗ് '
ഇന്നലെ എനിക്കും കിട്ടി
ഒരു പ്ളിംഗ്.
പട്ടിണിയാൽ കരയുന്നവർ
അങ്ങിനെ കരഞ്ഞോട്ടെ
കൊല്ലുന്നവർ പരസ്പരം
കൊന്നു തീര്ന്നോട്ടെ
അവരെ നോക്കാൻ ദൈവമുണ്ടല്ലോ ...!
എന്റെ ഭൂമി
നീ ഒന്ന് പതുക്കെ തിരിയൂ
ഞങ്ങള്ക്ക് സമയം
ഒന്നിനും തികയുന്നില്ല
ഞങ്ങളൊരു കൂട്ടം
മനുഷ്യ ജീവികൾ
തെരിവിലൂടെ അലയുന്നുണ്ട്
മൊബൈലും" പ്ളിംഗ്" മായി ...!

ചുംബന സമരം

ദാരിദ്ര രേഖയുടെ

അപ്പുറവും ഇപ്പുറവും നിന്ന്
ധനികൻ ദരിദ്രനെ
ചുംബിക്കാതെയും
ദരിധ്രന് ധനികനെ
ചുംബിക്കാനാവാത്തതുമാണ്
യെഥാർത്ഥത്തിൽ
ചുംബന സമരം ...!